要做功課

昨天和一班同班三個月都沒說過話的同學唱K，其中兩位同學唱歌好好好好聽…好羨慕。

第一次見識到女生唱歌好聽。

不過沒想到要唱個115元…哎…

學校的聖誕聯歡會都夠無聊。唉啊。

成日行CWY好累！

今日都幾多野做，同洗左幾多錢。本身經痛好唔想番學，但最後都番左學。見識到上年級既作品表，令我有番鬥志！佢地真係好用心好用心，我好敬佩啊。

之後就去左HMV買Planet Earth，碟有輯錄拍攝特輯，好鬼開心。之後無啦啦去左Skin Food買左支洗面奶，都係百二蚊。其實，係貪個包裝，呢個牌子既包裝好靚。頭先用左，用完塊面一Ｄ都唔乾，簡直好似無洗面咁，不過塊面係無哂油既，唔知係佢夠潤同點啦。跟手拎左好耐以前買既唔知咩牌但勁貴護膚精華……咦咦咦咦咦？Prada？點解係呢個牌子咖？！好驚訝！（不知不覺自己都有Ｄ名牌化妝護膚品…又shisedo又prada…）

同Ｄ小姐無野做就去左行共展會，幾好，幾多野睇，買左個枕頭^^ 雅芳婷特價……都係69蚊一個大枕頭咋！不過番到屋企就唔多捨得個舊既。

去左圖書館睇下參考書，得一本上心，仲要唔太好。

之後就去睇黃子華表演。

兩個字，勁好！！

係既，做人，點可以咩都話「係咁咖啦？」。連食人狂都搵到佢既食物人，世界仲有無可能咩？唔好俾借口自己，唔好用俾二五女整到我。我會記住呢句，一定！

無人識韓麗珠！

實在太鍾意Planet Earth。呢套，無咩詳細生物資料，只有美感既紀錄片。完全俾到人一種去旅行既感覺，睇個陣，好Relax。好喜歡個ｄ無中生有既音效，非常美麗既取景手法……所以我當左佢係藝術作品咁睇，仲要邊睇邊諗，呢套野到底要拍幾耐呢？

好想買DVD。可惜，無中文版。如果有出中文版我就馬上買，如果將來都唔出，我都會買美版。

（打完呢句既五分鐘後，我搵到中文版啦！而且好鬼平！平過美版好多！多謝香港！！！＞＜）

另外，我好鬼唔鍾意Ｄ小姐，實在係好討厭。令到我每日番學都好煩惱，至於Ｐ小姐一樣唔鍾意。於是，今日見唔到佢地番學，本以為自己會好無奈，點知幾開心咁完左今日番學日。哈～

Ｄ小姐令我見識到咩叫「面係人地俾，假係自己掉」。我從來都無放過呢句野上心，但識左Ｄ小姐後，我會緊緊記住呢樣野，同唔會再俾自己犯任何佢犯既錯，絕對唔會人地俾面我，我以為自己大哂，一定。





我諗，我都係鍾意同ｄ簡簡單單，無咩野諗既人做朋友。好多女仔都太多機心，雖然，都有好多男仔有。



樓下個間印尼小食店執左，好唔開心／＿＼

噢

自己之所以這麼低落，原來不單功課，可能因為沒有人緣。

也是，何必對人嚴肅？別人也沒義務待你好，我把自己本份做好就行了。

只是，因為個性不夠開朗樣貌不夠標青就得這樣，也是無奈。

無能

我很討厭，很討厭至今已不在年輕，卻一無事處，備受保護的自己。

討厭得想去哭，討厭得想去死。

無能力做自己喜歡做的事業，無能耐做自己不喜歡的事業，無能幹令父母滿意。

今後無論人生如何，我會盡自己最大的努力，去養活父母。

第一次做二打六

今日既「第一次做2打6」俾左好多經驗我，好開心，想打哂出黎。
細節上唔講。

原以為，臨時演員既代遇一定麻麻，點知ｄ幕後非常之ｎｉｃｅ。原以為，我係做一套電影既２打６，原來係做一個廣告既２打６。原以為，我要做ｗｅｔ妹，並非如此。


原來，呢個廣告由張邵涵主演。
原來，台上四秒，台下好多粒鐘。

１２點２０分，同制片商玩完捉迷藏之後（中途聯絡唔到中間人，嚇到我地死），我地３男３女二打六去到西貢偏僻既一個片場。

一入到後台，負責人士就好頭痛：「ｍｕｄ你地唔係自備衫既咩？」
我地個個尷尬，「無人咁講啊……」其實自以為合格。於是，呢位姐姐開始幫我地做營象顧問。兩位女２打６一試衫就ｏｋ，我就足足試左３套衫，最後，佢地要我著一件金色既衫，因為想有強烈修腰效果，仲要拎件衫去改左２次。（試完，馬上出來，「唔得唔得，試呢套啦」，有ｄ無奈，係咪我唔夠好？同咪，好驚訝，我只係一個２打６，何必有咁多改動？）

男仔方面似乎更麻煩，因為無咩男仔衫，但我一於少理。


因為我發現個廣告既男主角，一個非常非常非常非常靚仔既混血兒。雖然，阿姐我對靚仔無咩興趣，但，都好驚訝香港有咁靚仔既靚仔。（妖ＸＤ）

之後，我地都要換鞋。負責姐姐幫我搵左對「勁幼腳跟＋高跟幼帶涼鞋」，即係，高跟鞋。我呢，成世都係著拖鞋，呢野真係考起我……我真係唔多企到，而且，呢對鞋會造成我之後既痛苦。

之後就係化妝同ＳＥＴ髮型。幾開心啦，但又唔覺得好特別，只係覺得好似幾大牌（何）。我係２打６之嘛，仲特登化埋妝黎。

之但係呢，原來俾人化妝既感覺係好舒服。化妝姐姐用把好溫柔既聲指導我配合佢既化妝，好正。

負責姐姐再幫我地配埋首飾之後，我地就要等班男仔。因為佢地襯衫襯到傻。

等下等下就兩點，有飯盒到！係我最期待既一刻－－－真係有叉燒飯！！我緊係要個盒，仲要配埋奶茶個隻。所以，我就食到人生中最難食既叉燒。


不過，呢個都係一樣令我非常開心既事。一直，我都好想做２打６，ＭＯＵ埋一邊食飯盒。不過我地既待遇好好，有得入一間好舒服、有冷氣有沙發有乾淨廁所既房仔，無得ＭＯＵ埋一邊食飯盒ＸＤ。

終於呢，２點半啦，我地可以出去啦！因為係片場內拍，Ｄ景都係人地搭出黎……好靚啊，類似法國Ｄ時尚小街咁啦。而且，攝影機、燈光，都令我好興趣。

其實女主角係未到既，我地咁早出，係為左幫個廣告試光、睇企位、綵排。因為個位女明星好鬼貴咖嘛，所以有一個女替身做左佢個位。個女替身好靚，人又唔熱情，好喜歡佢。同咪，靚仔混血仔都一齊試演！原來佢好鬼鍾意講爛ｇａｇ。

ａｃｔｉｏｎ！我地就不斷咁試，我地既戲就係，ｏ係條街度好ｈｉｇｈ咁玩跳下玩下。其實，都真係幾難，無啦啦玩ｍｕｄ，著得咁斯文，身處法國小街，ｈｉｇｈ　ｍｕｄ！


唔理啦，係咁跳係咁跳，就咁跳左一個鐘。哇救命啊，好辛苦啊！我對死人鞋，成３吋咁高！成個人既重量去哂腳尖度，腳尖又俾一條又幼又硬既帶「ｃｏｏｌ」住，痛到「腰心腰肝」，成隻腳紅哂，仲要跳！

之後，女主角張邵涵出場啦！女替身就走ｌｕ。導演安排其中３個人手持雪糕（係啊呢個係雪糕廣告），我勁唔想佢選中我，但係事與願違啦。你話啦，搾住雪糕咁跳舞，唔係低能係咩？仲有一隻胡桃夾子士兵加入我地ｔｉｍ！佢好可愛，我地成日玩笑佢，佢就成日好無奈咁打番我地。

ｏｋ哂，我地就ｔａｋｅ左４次。阿女主角突然黑面拉住導演走左出去。好似係因為我地太ｈｉｇｈ，跳下跳下遮到佢。唉，張邵涵小姐得個五呎，我啊，五呎三吋＋三吋高跟鞋，另兩位女二打六仲要更高。嬲都正常既。

佢地商討既一邊，我地就係咁行黎行去啊，同負責佈置員工傾計。佢地都好和藹，不但吹得水，仲成日搞ｇａｇ。我一話口渴，又俾水我又幫我開又幫我貼貼紙上去等我認住支水。總之，好開心！

之後，我地６條２打６友係度諗點樣先唔好遮到阿姐呢，本來我就企ａ位，大家就要我企ｂ位。後來導演都要我企番ａ位。

好，張邵涵小姐返來啦。呢個時候有個好開心既決定，對死人高跟鞋可以離開我！因為咁高實在唔好意思～痛苦，８８！我地一眾女２打６都著拖鞋！萬歲！

後來，好似ｔａｋｅ左十幾次啦，總之又係跳左好鬼耐，導演同張邵涵小姐終於收貨。

好啦，大家一齊睇我地努力既演出。

演出既，只有手手手手手手！！！咁化妝黎做咩？
只有一個人可以上到鏡，仲要上到好應，個位就係本小姐。因為，我企ａ位，導演指定（旁人：你食屎啦）。

本來我好無奈，但見大家咁鬼妒忌我可以上鏡，佢地話「都化左成２粒鐘妝都想出下樣，連樣都無太過份啦，你就好啦」，我心底開心啦。（不過我個ｌｏｏｋ都算最樣衰個位…＝　＝）

咁又有得休息啦，無啦，四圍去行下，睇下人做咩，發下呆影下相吹下水咁，仲有零食食！

其實我地當中有人想同張邵涵影相，不過被經理人拒絕，好鬼大牌。成日無啦啦走去休息。

抖夠就來有另一場，我地要跳得咁加激動，但鏡頭係更加影唔到我地。即係一埋蒙糊人物係度郁。呢一場拍得真係好耐，跳到我想死，又要搾雪糕（中途換左三支雪糕，拍到溶～），又要ｈｉｇｈ。

之後都唔多記得啦（都得ｄ員工真係好好人），因為係咁跳，跳下跳下就６點半，收工。

好似夢一樣，啊，咁就完啦。我地去番後台換衫，就走。呢班好心員工仲搵人車我地出西貢去坑口站呢！可惜我後來先知自己唔小心漏左相機舊電同拎走左人地金手鐲，講真，好唔開心。點拎番ｗｏｗ，又點俾番人ｗｏｗ。

總結，今日，係片場渡過左６小時，真正做野就４粒鐘啦，唔計車程個ｄ，其實咁就有３００蚊收，又有人幫你化妝ｓｅｔ頭，我好滿足，好鬼滿足。一般臨記都無咁多錢嘛？

不過ｏ個位靚仔男演員，竟然收６０００一日？！雖然你真係好靚仔，但我對呢種同人唔同命非常憤恨………


---------


２打６有關又未算重點既事。

我係同ｄｏ一齊去做２打６，至於另一個女仔就唔識啦。

呢個女仔幾靚啊，幾識賣弄風情，好似（記住係好似）好好相處咁同好可愛，不過有Ｄ造作。但佢真係對自己好有信心同好鍾意自己，不能否認既事實。

雖然呢Ｄ唔係我欣賞既個性，但只要有少少似佢，我諗所有我呢Ｄ灰暗青年都會開心好多。

同咪對於佢俾人食夾棍呢件事實在唔知有咩感覺好。

仲有就係，ＳＯＮＩＣ實在好多缺點，亦勁唔討好，仲喜愛食夾棍。之但係，佢又可以俾到呢Ｄ我想番既工我（我最想做既雖然係幕後，但可以用第３者既角度睇佢地做野，我好開心），所以，都係唔知咩感覺。

最後我都係拿拿聲釘番個耳洞，費時再有下次做戲又俾人「無耳洞？下……」。

電影－塚愛

看了＜塚愛＞，大家都說很恐怖，也說很像＜妄想＞。我覺得不大恐怖，更加無法與＜妄想＞相提並論。無論內容、演技都是＜妄想＞勝出。

除了悶，很多不討好的故事設定（人設就拿得很準，畢竟說內心掙扎之類，尤其那個自私的第三者），差勁的剪接和氣氛控制……電影的中心思想在哪？這麼醜化一個病人作為恐怖片的題材，好嗎？

最後還是脫不開鬼怪之題材。

彭發，我對你很失望。

（不過余生要俾蟲蟲爬入口，真係慘）

電影－大隻佬、神探

本來打了一篇相當絕逞的文章，不過因為病毒而貼不出來，不貼也罷。

看了兩套杜琪峰、韋家輝的作品，＜神探＞和＜大隻佬＞。

我對神探有好深的期望，卻有點失望。

＜神探＞說的故事其實老土，人的內心有心魔啊，不過玩得幾有趣，拍攝手法、氣氛那些都不多說，杜琪風的拍法絕對有水準（喜歡與否就另當別說）。而內容，說穿了也不過是警匪片，可能是想從另一個角度解釋徐步高案件，這麼一想也不是太差，其實會買ｄｖｄ，只是，失望。

演員呢，劉青雲真的很好戲，其他選角也很不錯，除了林家棟。

大隻佬則不同。

貼別人感想。

杜琪峰、韋家輝執導的《大隻佬》，前名有《健美先生》、《大隻佬和尚》，加上影片宣傳上焦點放在劉德華的大隻佬造型身上，令人覺得影片似是杜、韋陣容近年慣怕的商業喜劇。然而，海報上煞有介事標明「萬般帶不走，唯有業隨身」，而英文片名更直截了當《Running on Karma》，似乎是給機會韋家輝講禪。觀賞過後，我發現《大隻佬》包含各種元素，有神秘懸案、赤身搞笑、血腥鏡頭、超現實處境、佛學等等，片種類型基本上無從歸類，只可說作品回歸《暗花》、《非常突然》時期杜、韋作品的風格。

《大隻佬》一片大概可以分為兩部份。頭半部主要講述大隻佬(劉德華飾演)結識女警李鳳儀(張柏芝飾演)的經過，以及大隻佬協助李鳳儀調查兩種懸案。此段相對上較商業化。一開場，大隻佬大跳艷舞，又不斷安排他赤身裸體，明顯是想賣弄肌肉特技，場面設計略嫌刻意，但效果的確比《瘦身男女》更為細緻。大隻佬與李鳳儀的交往經過，則一貫杜、韋愛情作品下的男女關係，帶出一些喜劇效果。

至於查案部份，則的確十分神怪懸疑。戲中，大隻佬曾協助李鳳儀調查兩件案件，其一是前世印度師徒報仇相殘案，案中兩印度人活像有「鐵頭神功」，而兇手更懂縮骨功，在港產電影中的確非常新鮮，也可為影片的「因果報應」主題作為引入，只嫌這宗案說得不夠，例如兇手與「湯寶如」的前世今生關係還可說得更多。其二是鬧市中的「飛天擒蟧」，同樣神奇，但對劇情發展幫助不大，而且出場不久便被大隻佬收拾。

當大隻佬告知李鳳儀她前世的日本軍身份，今生必需以性命償還後，影片變轉入第二部份，相對上較哲學性。李鳳儀即使努力當好女警一職，但也抵消不了前世當日本軍濫殺平民的債，便充分顯出杜、韋影片中一貫的「宿命感」。然而，李鳳儀決定在僅餘的時間作有意義的事，以身犯險上山尋找孫果，便是杜、韋勸勉港人在危難之時繼續安守本份，造些有意義的事而非埋怨天意弄人。

其實，《大隻佬》片中所指出的政治喻意，更為有趣。大隻佬儘管擁有一身強壯的肌肉，卻只有表面，內心實際膽小，活像是美國的縮影。面對李鳳儀的不測，登時感到憤怒，回到現實，就仿如美國政府在「911事件」後所作出的反應的寫照。真正大隻佬與假想孫果裝大隻佬的對峙場面，是一個人與心魔的交戰，所要說的是憤怒往往把一切遮蔽，以致不能冷靜，正所謂「一念天堂，一念地獄」，稍一不慎作出錯誤決定，可能會製造出更多不幸事件，令更多無辜人等牽涉事件當中，報仇事件從此循環不絕。片末，法號「了因」的大隻佬在深山遊蕩五年，肌肉也消失後，決定以寬恕之心對待「孫果」，就反映出影片製作人希望世上只有愛心、和平之心對待其他民族，不要借著自己財雄勢大，以暴易暴，企圖以戰事來解決問題。影片最後一個鏡頭，李鳳儀在深山「希望以後再無人殺人」，便點出編導這種祈盼。

說到演員方面，各人都演得出色。劉德華再度穿上假肌肉裝演戲，其專業精神已經值得肯定，而且他能反映出戲中大隻佬一角在李鳳儀遭遇不測後由憤怒到寬裕的心理變化。張柏芝雖然往往只被人留意較注意緋聞一面，但其演技更應值得注意。戲中，李鳳儀與大隻佬在中環閒逛一分鐘的戲，張柏芝演得很好，她既能表現李鳳儀一角與大隻佬相處一分鐘的歡喜，又顯出時不與我的無奈。此外，影片後段關於張柏芝的血腥鏡頭，深信很少本地女星願意演出，在此也配服張柏芝的勇氣。至於配角方面，例如重案組阿頭張兆輝、協助印度人逃亡的湯寶如，雖出場不多，但也有得發揮。

《大隻佬》故意以商業片格局作包裝，骨子裡卻是另一回事，其用意值得原諒。始終，即使有劉德華的出現，一部禪片的叫座力也是非常有限的。說到底，《大隻佬》在本地影壇中始終少見，有此佳績值得支持。對於大部份杜、韋陣容的Fans，信心《大隻佬》是繼《PTU》後另一令人非常滿意的作品。

P.S. 黃耀明主唱的《身外情》，配合戲中李鳳儀向大隻佬「借一分鐘」的場面，顯得格外悲涼，也成功為影片作轉折之用